SKILLS MEDIA

ZSTC yaridhiishwa na Chuo cha Mafunzo Katika Uimarishaji wa Zao la Karafuu

Na. Mwandishi Wetu.

Mkurugenzi Mwendeshaji wa Shirika la Biashara la Taifa Zanzibar (ZSTC) Nd. Soud Said Ali amesema Shirika la Biashara Zanzibar limeridhishwa na kazi ya uimarishaji wa zao la karafuu inayofanywa na Chuo cha Mafunzo Zanzibar.

Mkurugenzi Soud amesema hayo katika hafla ya kukabidhi vifaa kwa ajili ya uatikaji miche ya mikarafuu Chuo cha Mafunzo Langoni.

“Shirika linaridhishwa na kazi nzuri mnayofanya Chuo cha Mafunzo ya kuimarisha zao la karafuu na Shirika litaendelea kuunga mkono ili kuhakikisha zao hili linarudi katika asili yake”. Alifahamisha Mkurugenzi Soud,

“Chuo cha Mafunzo mna maeneo mazuri kwa upandaji wa mikarafuu na nguvu kazi ya kutosha hivyo kwa pamoja tunaweza kufanikiwa katika jitihada hizi za kuimarisha zao la karafuu na kuongeza uzalishaji”. Alisisitiza Mkurugenzi Soud.

Aidha juhudi hizo za umiarishaji wa zao la karafuu zitaendelea kwa utoaji wa vifaa vya uatikaji wa miche ya mikarafuu kwa vitalu vya wakulima binafsi na Wizara ya Kilimo

Kwa upende wake Kamishna Msaidizi Chuo Cha Mafunzo Zoni ya Mashamba ACP Amour Naimu Khamis. amesema kuwa Chuo cha Mafunzo kinashukuru na kuthamini mashirikiano baina yake na Shirika la ZSTC katika uimarishaji wa zao la karafuu.

Alisema kuwa, Chuo cha Mafunzo kitatumia vifaa na elimu wanayoipata Kutoka ZSTC katika kupanda na kuihudumia mikarafuu kwa maslahi ya Chuo, ZSTC na Serikali.

ZSTC na Chuo cha Mafunzo Zanzibar wameingia katika makubaliano na mashirikiano ya kuimarisha zao la karafuu kwa kupanda mikarafuu katika mashamba ya chuo cha Mafunzo, uanzishwaji wa kitalu cha miche ya mikarafuu, uchimbaji wa visima na miundombinu ya umwagiliaji.

Katika hafla hiyo Mkurugenzi Soud alikabidhi vifaa mbali mbali kwa ajili ya uoteshaji miche ya mikarafuu ambayo itapandwa katika mashamba ya Chuo cha Mafunzo Langoni na Kinumoshi.

T.O.T WAPEWA MAFUNZO YA KUTUMIA VYOMBO VYA HABARI KUJITANGAZA

Na.Nafda Hindi, TAMWA ZNZ.

Wanawake wameombwa kuvitumia vyombo vya habari ipasavyo kwa lengo la kutangaza kazi wanazozifanya katika kukabiliana na mabadiliko ya tabianchi.

Akifungua mafunzo ya siku moja ya kuwajengea uwezo wanawake viongozi kupitia mradi wa Zanz Adapt Mkurugenzi wa chama cha Waandishi wa habari Wanawake Tanzania Zanzibar, TAMWA ZNZ Dkt Mzuri Issa Ali amesema wanawake wanafanya mambo mengi katika jamii ila bado mchango wao haujatambulika kama ilivyo kwa wanaume, hivyo kuvitumia vyombo vya habari kutawezesha kutambulika na kujitangaza kwa haraka hasa kupitia mitandao ya kijamii.

Amesema historia ya Tanzania na Zanzibar kwa ujumla haioneshi mchango ama juhudi za wanawake kwa sababu wanawake bado hawajawa na ujasiri na uthubutu wa kutumia vyombo vya habari kwa usahihi.

“Wanawake wanafanya mambo mengi katika jamii na kujitoa zaidi, sasa wakati umefika kueleza changamoto na mambo yanayowahusu kupitia vyombo vya habari ili kupatiwa ufumbuzi,” Dkt Mzuri.

Mkufunzi katika mafunzo hayo Saphia Ngalapi amesema vyombo vya habari vina nafasi kubwa ya kutatua changamoto za kijamii, kwa kuzifikia mamlaka husika kuzitafutia ufumbuzi baada jamii kuelezea changamoto zao.

‘’Kupitia vyombo vya habari nyinyi nimashahidi tuanaona hatua zinazochukuliwa kwa wahusika endapo kutatokezea tatizo,” Ngalapi.

Akizungumzia mada inayohusu jinsia amesema wazazi/walezi kuwalea watoto wao katika muktadha wa kijinsia kuhakikisha kila mtoto anapata fursa na haki sawa kama zilivyoeleza katiba zote mbili ya Jamhuri ya Muungano wa Tanzania na Serikali ya Mapinduzi ya Zanzibar bila kujali jinsia zao.

Nae Afisa Mawasiliano kutoa Jumuiya ya Misitu Pemba (CFP) Munira Iddi Kaoneka amesema wanawake hawana budi kujiamini na kutumia vyombo vya habari kutangaza kazi wanazofanya ikiwemo mitandao ya kijamii kwani ujumbe wao hufikia watu wengi na kwa wakati mmoja.

“Mukilima na kuvuna mazao yenu halafu mukanyamaza kimya nani atajuwa kama muna bidhaa, ila chukuwa video ukivuna mazao kisha rusha Tiktok weka nambari za simu, soko litakuja na watu watakutafuta,” Munira.

Wanawake viongozi waliopata mafunzo ya kuwajengea uwezo na kuwainuwa kiuchumi kwa kulima kilimo msitu chini ya mradi wa ZanzAdapt wamesema watayatumia vyema mafunzo hayo kwa kuwa mabalozi bora wa kuwafunza wengine il kukabiliana na mbadiliko ya tabianchi.

Mradi wa Wanawake na Uongozi katika kukabiliana na mabadilio ya tabianchi (ZanzAdapt) unatekelezwa kwa pamoja na Chama cha Waandishi Wahabari Wanawake Tanzania TAMWA ZNZ, Jumuiya ya Misitu Pemba (CFP) na Jumuiya ya Misitu Kimataifa (CFI) kwa kushirikiana na ubalozi wa Canada.

Serikali ya Mapinduzi ya Zanzibar kuendelea kufanyakazi na Sekta Binafsi

Na,Mwandishi wetuu.

Makamu wa Pili wa Rais wa Zanzibar Mhe. Hemed Suleiman Abdulla amesema Serikali ya Mapinduzi ya Zanzibar itaendelea kushirikiana na kufanya kazi kwa pamoja na Taasisi binafsi kwa lengo la kuwaondoshea wananchi changamoto mbali mbali zinazowakabili.

Ameyasema hayo katika maadhimisho ya kumbukizi ya kuzaliwa kwa Rais wa Jamhuri ya Muungano wa Tanzania Mhe.Dkt Samia Suluhu Hassan yaliyofanyika katika Kiwanja cha Ofisi ya Sheha wa Shehia ya Kizimkazi Dimbani Mkoa wa Kusini Unguja.

Amesema Serikali inatambua na kuthamini mchango mkubwa unaotolewa na Taasisi Binafsi ikiwemo Taasisi ya Mwanamke Initiative Foundation ( MIF ) iliyolenga kupambana na ujinga, maradhi na umasikini hasa kwa wanawake na watoto.

Mhe. Hemed ameipongeza Taasisi ya Mwanamke Initiative Foundation kwa kuendelea kuisaidia Serikali kupitia Sekta mbali mbali kama vile Elimu, Afya, Uwezeshaji na nyenginezo kwa lengo la kumsaidia mwananchi hasa mwanamke kujikwamua kiuchumi na kumuwezesha kuweza kujitegemea.

Aidha, Makamu wa Pili wa Rais wa Zanzibar amefurahishwa kuona katika maadhimisho hayo shughuli mbali mbali za kijamii zitafanyika ikiwemo uchangiaji wa damu salama itakayosaidia kuokoa maisha ya mama wajawazito na watoto, vifo vitokanavyo na ajali na majanga mbali mbali yanayohitaji damu salama na kwa haraka zaidi.

Sambamba na hayo amewakumbusha na kuwasisitiza wananchi kuendelea kuitunza amani na umoja uliopo nchini ambazo ndizo nyenzo muhimu ya kufikia maendeleo ya Serikali iliyojiwekea kwa waanchi wake.

Akizungumza kwa Niaba ya Waziri wa Afya wa Zanzibar, Waziri wa Maendeleo ya Jamii, Jinsia,Wazee na Watoto Mhe. Riziki Pembe Juma ameipongeza Taasisi ya MIF kwa kuendelea

kuekeza katika harakati za maendeleo hasa katika kumuinua Mwanamke kiuchumi, kuimarisha Afya ya jamii na kuokoa vifo vya mama wajawazito na wahanga wa majanga mbali mbali.

Mhe. Pembe amesema Taasisi ya MIF imekuwa mstari wa mbele kujitoa katika kupambana na changamoto mbali mbali zinazokwamisha maendeleo nchini na kuhakikisha mwanamke wa Kitanzania anapata fursa mbali mbali za kimaendeleo.

Kwa upande wake Mwenyekiti wa Taasisi ya Mwanamke Initiative Foundation Mhe. WANOU HAFIDH AMEIR amesema lengo la kufanyika kwa matembezi ya kumbukizi ya kuzaliwa kwa Rais Dkt. Samia ni kuwashajihisha wananchi kufanya mazoezi ili kuimarisha Afya na kupambana na maradhi nyemelezi ambayo yamekuwa yakienea kwa kasi nchini.

Amesema Taasisi ya MIF Imejipanga kupambana na adui maradhi, umasikini na ujinga kwa kuhakikisha inawafikia Watanzania popote walipo katika kuwawezesha kupambana na maadui hao kwa maendeleo ya Taifa.

Mhe. Wanu amesema kaulimbiu ya maadhimisho hayo ni "MOYO WANGU MAISHA YANGU" inayolenga kuwafahamisha wananchi kutunza afya zao dhidi ya maradhi yasiyoambukiza yakiwemo kisukari, sindikizo la damu na maradhi ya moyo pamoja na kuchangia damu salama ili kuokoa maisha ya Watanzania wanaopatwa na majanga mbali mbali.

Katika maadhimisho hayo ya kumbukizi ya siku ya kuzaliwa ya Rais Dkt. Samia Taasisi ya Mwanamke Initiative Foundation imetoa msaada wa gari nne (4) za kubebea wagonjwa (Ambulance) mbili kwa hospitali za Unguja na gari mbili zitapelekwa Pemba pamoja na viti hamsini (50) kwa ajili ya watu wenye mahitaji maalum na kuwaomba wahusika kuvitunza vizuri vifaa hivyo ili viweze kutumika kwa muda mrefu .

Wajasiriamali wa TASAF waeleza Mafanikio ya Mpango huo Zanzibar

Na, Mwandisho.

Unguja. Wajasiriamali waliopo kwenye vikundi vya Mpango wa Maendeleo ya Jamii (TASAF) wameeleza namna mpango huo ulivyowaondoa kuitwa kaya masikini na sasa wanaweza sio tu kujitegemea bali wamekuwa msaada kwa watu wengine.

Mpango wa kunusu kaya masikini kwa Zanzibar ulianza mwaka 2013 ukiwa katika afua tatu: Ruzuku, ajira za muda na miundombinu ambapo mpaka sasa ina vikundi 3,372 vyenye wanachama 45,948.

Vikundi hivyo vimekusanya akiba ya zaidi ya Sh1.6 bilioni na vimeendelea kukopeshana kwa ajili ya kuanzisha na kutekeleza miradi ya kuwaongezea kipato.

Wakizungumza katika maonyesho ya biashara ya kimataifa Dimani Nyamanzi Januari 13 2025, baadhi ya wajasiriamali wanaonufaika na mfuko huo wamesema hawakuwahi kufikiria kama wanaweza na wao wanweza kushirkia maonyesho makubwa ya biashara kama hayo.

Khadija Slaym Salim mkazi wa Kianga amesema mwanzo walikuwa kaya masikini lakini kwasasa wanajivunia kunufaika wamenufaika kupitia kwenye vikundi vyao na kujiongezea vipato.

“Ukiachilia mbali kuwa kwenye vikundi lakini kila mtu nyumbani kwake anaedesha biashara zake binafsi mimi nyumbani ninamlango wa duka kila ninachopata naongeza, Tasaf imetunufaisha tunaweka akiba ikifika mwisho wa mwaka tunagawana zingine tunaacha kuendeleza biashara zetu,

Khadija mesema mbali na kunufaiaka mmojammoja lakini wamenufaika kwenye huduma za kijamii kama shule, barabara, na hospitali kwasasa watoto wanakwenda shuleni bila changamoto zozote

“Tofauti na mwanzo watoto walikuwa wanashindwa kwenda shule, mikoba ya daftari hawakuwa nayo, mtoto akienda shule tulikuwa tunakunguta mifuko ya unga tunawapa lakini sahiv begi wanapata,” amesema

Amesema huu mpango walioleta umesaidia wanawake kwani kipindi cha nyuma ilikuwa lazima mpaka wategemee wanaume lakini kwasaa wanajitegemea wenyewe na kuwasaidia wengine.

Ametumia fursa hiyo kuwasihi wanawake wanapopata fursa kama hiyo kijiendelza kwenye vikundi ili wazidi kujikwamua kimaisha.

Mnufaika mwingine, Naomba Bakari Hassan kutoka Kikundi cha Kutoa ni moyo Chakechake Pemba amesema walikuwa na maisha magumu lakini kwasasa wanaendelea kuimarika kupitia kwenye vikundi vyao.

“Sasahivi tunasomesha watoto tunapata fedha za huduma za nyumbani na kusomesha watoto tofauti na ilivyokuwa awali tunashukuru tunapata kwasaa tumeondoka kwenye utegemezi, kwasasa kila kitu tunaweza kufanya wenyewe na tumeimarika,” amesema Naomba

Amesema kabla ya kuingia kwenye mradi alikuwa na maisha magumu lakini kwasasa ni maisha bora, “familia yangu inakula, namimi najitosheleza mahitaji yangu kupitia biashara ninayoifanya.

Naomba anayefinyanga viotezo na kushona mikoba anasema ndoto zake anataka awe mfanyabiashara mkubwa na kuwa na maisha bora zaidi.

Mwingine mtoto wa mnufaika Raya Suleiman Hamad kutoka kukindi Tushikamane cha Mgogoni Wete Pemba anasema wazazi ndio wapo kwenye mpango walipopata ruzuku wakatengeneza mafuta na bidhaa zingine kwa ajili ya kuuza.

Raya ambaye amesomeshwa na ruzuku ya Tasaf iliyokuwa ikitolewa kwa wazazi wake, amesema kwasasa ameshakuwa mtaalamu kwenye ujasiriamali baada ya kufundishwa hivyo wanataka kufika mbali zaidi kwenye maisha.

Mkurugenzi wa Mifuo na Mawasiliano ya Umma Tasaf, Japhet Boaz amesema hizi zilikuwa kaya masikini ambazo hazikuwa na uwezo kujitokeza ila kwasasa wameugana pamoja na wanatengeneza bidhaa na kuja kwenye maonesho kama haya ya kimataifa.

“Wametumia faida kuwapeleka watoto shule, na kujiwekea akiba wakifanya mambo mengi ya maendeleo na kuimarisha makazi yao na kuwekeza mengine,” amesema

Kwa mujibu wa Boaz, wanatiwa moyo kwamba kazi wanayoifanya na kazi ambayo serikali imedhamiria kwa wanachi wake inaleta matunda.

Amesema kaya baada ya kuzisaida wanaziweka kwenye vikundi, wanaweza kuweka akiba na wanaweza kukopeshana eneo ambalo nalo linafanya kazi vizuri.

“Kiasi kwamba hata hawa tunaowaona hapa kwenye maonyesho wametoka kwenye vikundi wakabuni miradi kulingana na mazingira waliyonayo kisha wameendelea kutengenza vitu mbalimbali na bidhaa nyingi zinazotokana na asili,” amesema

Kwa upande wa Zanzibar kuna afua tatu, wanatoa ruzuku ya fedha kwa kaya masikini ambapo mpaka sasa wameshatoa Sh50.1 bilioni kwa muda wa miaka 10 kwenda kwenye kaya masiki.

Afua ya pili wanatoa ajira za muda kwenye kaya hizo ili kuwaongezea kipato wanabuni miradi katika jamii wanafanya kazi wanapata ujira unaowasadia kuongeza kipato.

Afua nyingine ni ujenzi wa miundombinu ambapo katika hilo wanaangalia eneo ambalo linapungukiwa katika sekta ya elimu, afya pamoja na maji.

Amesema Tasaf imekuwa mstari wa mbele kuitikia wito wa serikali ambapo katika sherehe hizi za Mapinduzi wamezindua vituo vya afya viwili, Upenja Kaskazini Unguja ambachokitahudumia zaidi ya wananchi 1100 na Kingine kipo Wete Pemba Kinyikani na nyumba ya watumishi.

Amesema wameona kuna upungufu wa huduma za jamii kwahiyo kaya masikini wanazohudumia inakuwa ni ngumu kufuata huduma hizo kwahiyo inawaletea athari kubwa.

Amesema wanaamini kaya nyingi pamoja na jamii nyingine watapata huduma katika maeneo waliopo kwa ufanisi zaidi.

Naye Mratibu wa Tasaf Unguja, Makame Ali Haji amesema kwa taratibu za Tasaf kila kikundi kinakuwa na wanachama 15 ambao wanajiweka pamoja kujiweka akiba na kuanzisha biashara ndogondogo, “tunashukuru wametumia rasimali za bahari kujiendeleza kiuchumi”

“Wapo wanaolima mwani na wengine wameanzisha uzalishaji wa sabuni unaotokana na mwani, tunashukuru sana wananchi hawa wameweza kujiimarisha kiuchumi na tunafahamu mpango huu unaendelea vizuri,” amesema Makame

Amesema walengwa hao ni kwamba wametoa katika mpango wa masikini na kutafuta wengine wapige hatua wajiendeleze na kujikwamua kiuchumi.

JAFO AFUNGUA MAONESHO YA KUMI NA MOJA YA BIASHARA ZANZIBAR

NA, Fatma Rajab

Waziri wa viwanda na Biashara Tanzania Mhe. Suleiman Said Jafo amesema maonesho ya 11 ya biashara ni jukwaa muhumu la ukuzaji wa sekta ya biashara na uwekezaji nchini.

Akifungua maonesho ya 11 ya biashara Zanzibar huko Nyamazi alisema maonesho hayo yanatoa fursa kwa wananchi kupata taarifa mbali mbali za kibiashara hali inayopelekea ukuaji wa biashara na uchumi na uwekezaji nchini.

Katika kuboresha maonesho hayo Waziri Jafo aliziomba Wizara husika kuhakikisha inajenga majengo ya kudumu katika maonesho hayo ili kuweka mazingira mazuri ya maonesho hayo.

Katibu mkuu wizara ya maendeleo ya viwanda na biashara Zanzibar bi Fatuma Mbarouk alisema maonesho hayo tangu yalipoanzishwa mwaka 2014 yamekuwa chachu ya ukuaji wa biashara nchini kutokana na kuengezeka kwa wafanya biashara mwaka Hadi mwaka

Mapema Mwenyekiti wa jumuiya ya wafanya biashara Zanzibar Ali Suleimani Amour aliiomba serikali kuhakikisha kua kampuni binafsi zinapewa fursa za kuandaa maonesho makubwa kama hayo ili kutoa fursa ya ushindani mkubwa wa kibiashara nchini.

Maonesho hayo ambayo yanabeba kauli mbiu ya biashara mtandao kwa maendeleo ya uchumi na uwekezaji yameshirikisha wafanya biashara kutoka sekta mbali mbali za kibiashara wa ndani ya Tanzania na nje ya Tanzania

Mhe, Hemed Ashiriki siku ya Maadhimisho Siku ya Maadili

Na, Mwandishi wetu

Makamu wa Pili wa Rais wa Zanzibar Mhe.Hemed Suleiman Abdulla amesema Maadhimisho ya siku ya Maadili na Haki za Binaadamu Zanzibar yana lengo ya kuwaongezea uwelewa viongozi wa umma na wananchi kuhusu umuhimu wa maadili, Utawala wa Sheria, haki na usawa, uadilifu na uwajibikaji pamoja na kuzuia rushwa na ubadhirifu wa mali za Umma.

Ameyasema hayo kwa niaba ya Rais wa Zanzibar na Mwenyekiti wa Baraza la Mapinduzi Mhe.Dkt Hussein Ali Mwinyi katika Maadhimisho ya siku ya Maadili na Haki za Binaadamu Zanzibar yaliyofanyika katika Ukumbi wa Baraza la Wawakilishi Wete Pemba.

Amesema kila Taasisi na mwanachama kwa nafasi yake anapaswa kuhakikisha anatekeleza misingi ya utawala bora ili kuimarisha uadilifu, haki za Binaadamu na kuzuia rushwa ili Serikali iweze kufikia malengo yake ya kuwapatia maendeleo wananchi wake.

Makamu wa Pili wa Rais amesema Taasisi zinazosimamia Utawala bora ikiwemo Tume ya Maadili ya Viongozi wa Umma na Tume ya Haki za Binaadamu na Utawala bora zimepiga hatua na zinaendelea kupata mafanikio katika utekelezaji wa majukumu yao ikiwemo kudhibiti mianya ya rushwa, upotevu wa mapato ya Serikali pamoja na kuhakikisha kwamba fedha zinazotolewa kwa ajili ya miradi ya maendeleo na fedha za matumizi ya kawaida kwa kila mwezi zinazopelekwa katika kila Wizara, Idara na Taasisi zinatumika kwa mujibu wa utaratibu uliowekwa.

Aidha Makamu wa Pili wa Rais amesema kuongezeka kwa idadi ya hati safi za ukaguzi ni uthibitisho tosha unaoonesha kuwepo kwa uwajibikaji katika usimamizi na matumizi ya rasilimali za umma uliopelekea kuimarika kwa huduma bora na ustawi wa jamii ikiwemo Miundombinu, Elimu, huduma za Afya, Umeme na Maji.

Sambamba na hayo Mhe. Hemed amewakumbusha viongozi wote kufanya kazi zao kwa kufuata sheria na miongozo ya kazi zao na kutoa maelekezo kwa Tume ya Maadili ya Viongozi wa Umma kwa kushirikiana na Mamlaka nyengine husika kutosita kuwachukulia hatua za kinidhamu zinazostahiki kwa mujibu wa sheria viongozi wote wanaolalamikiwa kuvunja maadili katika nchi.

Nae waziri wa Nchi Ofisi ya Rais, Katiba, Sheria, Utumishi na Utawala Bora Mhe. Mwalimu Haroun Ali Suleiman amesema ni jukumu la Viongozi na watumishi wa Umma kuwa na Uzalendo, Uwajibikaji, Uwazi na Uadilifu ambavyo ndio vigezo na mihimili ya Utawala bora wenye kufuata sheria na maadili.

Mhe. Harun amesema katika kuhakikisha elimu ya Maadili na Utawala bora inawafiki viongozi, watumishi wa umma na wananchi wote, Wizara yake imeanzisha Online TV ambayo inalenga kufikisha Taaluma kwa kuandaa Vipindi vitakavyoonesha utendaji kazi wa Wizara na Taasisi zote za Serikali na Binafsi ili kutanua wigo na uwelewa mpana wa Haki za Binaadamu nchini.

Akiwasilisha maada katika maadhimisho hayo juu ya umuhimu wa usimamizi wa Rasilimali za umma na Mapambano dhidi ya Rushwa katika kuimarisha Utawala Bora Mhe. Jaji Ibrahim Mzee Ibrahim ameelezea makosa mbali mbali ya kisheria ambayo viongozi na watumishi wa umma wanatakiwa kujiepusha nayo ikiwemo kutoa na kupokea rushwa, usimamizi na matumizi mabaya ya rasilimali za Umma pamoja na matumizi mabaya ya madaraka .

Jaji Ibrahim amesema Viongozi na watumishi wa Umma ni vyema kujiepusha na yale yote yaliyotajwa katika kifungu cha 18, Sheria namba 4 ya mwaka 2015, Sheria ya maadili ya Viongozi wa umma Zanzibar ili kuendelea kuwa na viongozi bora wenye kufuata sheria, miongozo na Maadili ya Viongoziwa Umma kwa maslahi mapana ya nchi.

Maadhimisho ya siku ya Maadili na Haki za Binaadamu hufanyika kila ifikapo Disemba 10 ya kila mwaka ambayo yanaenda sambamba na siku ya mapambano dhidi ya rushwa ambayo hufanyika kila ifikapo Disemba 9 ya kila mwaka ambapo kwa upande wa Zanzibar maadhimisho hayo hufanywa sambamba Disemba 10 ambapo hubeba maudhui yenye mnasaba na siku hizo.s

Watembezaji watalii watakiwa kufuata Sheria

Na. Fatma Rajab

Wizara ya uchumi wa buluu na uvuvi imewataka watembezaji wageni na walinzi katika maeneo ya hifadhi kufuata sheria na taratibu zilizopo ili kuweza kuepusha matukio kyasiyofaa.

Hayo yameelezwa na katibu mkuu wizara ya uchumi wa buluu Mh. Hamad Bakar Hamad wakati alipokuwa akizungumza na waandishi wa habari katika ukumbi wa kutano wa zura wilaya ya mjini unguja.

amesema wizara inakemea vikali tukio la kutotii amri kwa mmoja ya watembezaji wa wageni katika hifadhi ya mnemba (MIMCA) pamoja na sitofahamu iliyojitokeza baina ya walinzi na watembezaji wageni siku ya jumatano ya tarehe 20.11.2024.

Amesema tukio hilo linakwenda kinyume na sheria na taratibu za kusimamia hifadhi zetu, wizara kwa kushirikiana na kamisheni ya utalii KMKM pamoja na vyombo vya ulinzi na usalama linaendelea na uchunguzi wa tukio hilo na hatua kali zitachukuliwa kwa atakaebainika kwenda kinyume na sheria na taratibu zilizowekwa.

Hata hivyo wizara kupitia idara ya uhifadhi wa bahari inaendelea kutoa mafunzo kwa walinzi wake na elimu kwa jamii juu ya kufahamu namna bora ya kuendesha shughuli za utalii katika maeneo ya bahari zanzibar

Maru Maru Hotel kuanza maandlizi ya Kirismas

Na, Fatma Rajab

Meneja msaidizi wa Hoteli ya maru maru Philip Mwakimu amesema wameanza na shughuli ya uandaaji wa keki ya krismasi ambapo ni desturi yao kila ifikapo mwezi mmoja kabla ya kufika krismasi.

Ameyasema hayo wakati akizungumza na waandishi wa habari katika maandalizi ya keki ya kirsimas katika hotel ya Marumaru iliyopo mji mkongwe wilaya ya mjini.

Amesema dhamira kuu ya kufanya sherehe hizo ni kuendeleza utamaduni walio jiwekea kila mwisho wa mwaka pamoja na kujitangaza kibiashara na mataifa mbali mbali, pamoja na kuwa kivutio kwa watalii wanaotembelea nchini.

Nae mpishi mtendaji wa hoteli hiyo SK FIRDOUSH amesema katika mchanganyiko wa keki hiyo kunavitu mbali mbali ambavyo vinachanganywa katika keki hiyo ikiwemo tundadamu,papai,korosho,zabibu,cheza, na matunda mengine, ili kutengeneza kuwa na ladha nzuri.

kwa upande wake mpishi msaidizi chef Mohammed Abdallah amesema keki hio ina uzito wa kilo 75 na inatosheleza zaidi ya watu mia

JAMII IMETAKIWA KUSHIRIKIANA KATIKA MALEZI YA WATOTO

Na,Fatam Rajab

Jamii imetakiwa kushirikiana na walimu wa madrasa katika kuwalea watoto katika maadili mema yenye kupwekesha Mwenyezi Mungu.

Hayo yameelezwa nakatibu wa kamati ya maadili kupitia baraza na Taasisi za kiislamu Zanzibar Abdalla Mnubi Abas ambae ni katibu wa kamati ya maadili kupitia Jumuiya ya maimamu Zanzibar wakati alipokuwa katika muhadhara wa kujadili suala zima la maadili kwa watoto katika kijiji cha banda kuu Nungwi Zanzibar.

Amesema vyuo vya madrasa vina umuhimu mkubwa katika jamii na ni njia moja ya watoto kukuwa katika maadili mema na sehemu pekee ya kurudisha maadili katika jamii ni vyuo vya Qurani ambayo hufundisha tabia njema na kuacha tabia mbaya zisizokuwa na maadili

Aidha amesema"kutokana na uvamizi uiliopo katika kijiji cha Nungwi kuwepo kwa mahoteli na wageni mbali mbali ambao wanatoka ndani ya nchi na nje ya nchi kutofuata maadili na kuvaa vivazi ambavyo havifai.

Aidha,amewataka wazazi na walezi kuiga malezi ambayo waliolelewa na wazee wa zamani na kuishi kirafiki na watoto wao ili kugundua changamoto wanazo kumbana nazo.

Kwa upande wake sheha wa shehia ya bandaa kuu Nungwi Haji Khamis Haji amesma tatizo la maadili limekuwa kubwa katika jamii na linatokana na changamoto mbali mbali ikiwemo mazizngira, wigo, na uingiaji wa wageni kiholela.

Amesema mikakati mabli mbali ambayo imechukuliwa katika kijiji hicho ikiwemo ya kiwekwa mihadhra yenye kuelimisha watu katika suala zima la maadili, pia amesisitiza wazazi na walezi kukaa karibu na watoto wao na kuwap elimu kuhisiana na masula ya kumcha Allah ili waweze kuepukana na vitendo viovu.

Akitoa wito kwa wageni Ndg Haji Khamis Haji amesema "wageni wanatakiwa kungalia jamii inaishi vipi ili kuepusha upotevu wa maadaili endapo watafika katika jamii na wanatakiwa kuzingatia sharia za sehemu husika.

Hata hivyo wazazi na walezi wa kijiji hicho wamaitaka jumuiya ya maimu kuwasaidia katika malezi na kukza maadili ya jamii ili kuwa na kazazi chema chenye kufuata maadili mema .

Na Fatma Rajab

Waziri wa Maendeleo ya Jamii,Jinsia Wazee, na Watoto Zanzibar, Mhe. Anna Athanas Paul amesema, kwa mujibu wa Sheria ya Mtoto inamuonesha kuwa na haki ya kucheza Michezo ya aina yoyote hivyo ameitaka Jamii kuunga mkono juhudi za Watoto katika harakati za kujijengea uwezo kupitia michezo.

Akizungumza mara baada ya kushuhudia Michezo ya Watoto katika Viwanja vya Mou Tes Tung amesema, Wizara hiyo kwa kushirikiana na Wizara ya Elimu Zanzibar wataendelea kuunga mkono shughuli za michezo kwa Watoto na kuwalinda katika nyanja zote za maisha.

Kwa upande wake Mkurugenzi wa Jumuiya za Michezo zilizochini ya Serikali ya Mapinduzi ya Zanzibar, Hashim Pondeza amesema, Wanawake wanapaswa kushiriki katika Michezo kwa misingi ya mila na desturi, hivyo ameitaka Jamii kuendelea kuwahamasisha Watoto kushiriki katika Michezo mbalimbali ikiwa na lengo la kuwajengea uwezo wa uelewa na kujiamini katika harakati zao za kila siku.

Kwa upande wake Afisa Programu kutoka Chama cha waandishi wa habari Wanawake Tanzania Zanzibar TAMWA ZNZ Asia Hakim Makame amesema vyombo vya habari vina mchango mkubwa katika kuelimisha jamii, umuhimu wa mtoto wa kike kushiriki katika michezo na kufikia ndoto zao.

Maadhimisho hayoya siku ya mtoto wa kike yamejumuisha washirika wa S4D wakiwemo TAMWA ZNZ. CYD, ZAFELA, na GIZ.

Mikakati kukabiliana na Tabia ya Nchi yaanza Kuchukuliwa

Na, Fatma Rajab.

Serikali ya Mapinduzi ya Zanzibar na Serikali ya Jamhuri ya Muungano wa Tanzania zimekuwa zikichukuwa hatua mbali mbali kuweza kuhimili na kukabiliana na mabadiliko ya tabia ya nchi miongoni mwa hatua hizo ni pamoja na kuingiza mabadiliko ya tabia ya nchi kwenye mipango ya Taifa ya maendeleo kama vile dira ya Taifa ya maendeleo ya zanzibar ya mwaka 2025 na mpango wa maeneleo ya zanzibar wa 2021 2026..

Hayo yameelezwa na waziri wa nchi afisi ya Makamo wa kwanza wa Rais Mhe. Harusi Said Suleiman wakati alipohudhuria mkutano wa kwanza wa mabadiliko ya tabia ya nchi uliofanyika katika ukumbi wa Sheikh Idrissa Abdul wakil kikwajuni Zanzibar,

Amesema serikali imetaarisha mkakati wa mabadiliko ya Tabia ya nchi wa zanzibar wa mwaka 2014 ambao umeeleza vipaumbele na hatua zinazofaa kuchukuliwa na kukabiliana na mabadiliko hayo kuwepo kwa hatua mbali mbali za kupanda miti ya aina mbali mbali ikiwa ni pamoja na miti ya mikoko, mitandaa katika maeneo ya fukwe ili kupunguza kasi ya uingiaji wa maji ya bahari katika maeneo ya kilimo kwa lengo la kuwafanya wananchi wetu kuendelea kuyatumia maeneo hayo kwa shughuli za kilimo na kiuchumi"

Aidha amesema katika kipindi cha miaka 30 iliyopita wastani wa kiwango cha joto kilipanda ongezeko kubwa la kiwango cha juu cha joto kufikia nyuzi joto 39" hivi karibuni imeshuhudia mvua zisizotambulika wakati mwengine zinanyesha kubwa na kupelekea mafuriko wakati mwengine zinanyesha kinyume na wakati tusioutarajia haya yote ni yanatokana na athari ya mabadiliko ya tabia ya nchi,.

Aliongeza kusema kuwa maeneo ya ukanda wa pwani yaliyochini ya muinuko wa mita 5 yapo kwenye tishio la kuathirika na kupanda kwa kina cha bahari na maeneo hayo kwa unguja yanajumala ya kilomita za mraba 328 na kwa kisiwa cha pemba yana kilimita za mraba 286.

Kwa mujibua wa taarifa zilizokusanywa na na afisi ya Makamo wa kwanza wa Rais mwaka 2012 Zanzibar ina jumala ya maeneo 148 yakiwemo pemba 123 na Unguja 25 yanaingia maji ya chumvi na zaid yakitumiwa kwa shughuli mbali mbali za kiuchumi, kilimo kijamii lakini kutokana na kuingia maji ya chumvi yanayosababisha kupanda kwa kina cha bahari wananchi wa maeneo hayo sasa hawawezi tena kuendelea na shughuli zozote katika maeneo hayo

Aikizitaja sekata za kiuchumi zilizo athirika zaidi na mabadiliko ya Tabia ya nchi Mhe Harusi amesema"sekata za kiuchumi zilizoonekana kuathirika zaidi hapa Zanzibar ni uvuvi wa ukanda wa pwani, ukulima wa mwani ,kilimo ,utalii,maji makaazi na miundombinu".

Nae Mkurugenzi Mtendaji wa jumuiya ya Zanzibar Climate Change alliance ZACCA ambae pia ni mwenyekiti wa mkutano wa kwanza wa mabadiliko ya tabia ya nchi Mahfoudh Shaaban amesema kuna tathimini ambazo wamezifanya wao kama zacca kwa kushirikiana na wadau wengine ni kuweza kuchunguza uwelewa na ufahamu lakini pia ni kutaka kujua ni naman gani ya wadau mbali mbali kuanzia serikali mpaka wadau wa asasi za kiraia wanaweza kuhimili athari za mabadiliko ya tabia y nchi.

Hatahivyo amesema kuwa tathimin hiyo imeonesha kuna uwazi mkubwa wa watu kuelewa masuala hayo hivyo mkutana huo una lengo la kujenga uwelewa wa kuendeleza na kuimarisha nguvu za pamoja katika kuhimili athari za mabadiliko ya tabia ya nchi hapa Zanzibar.

Baraza la sanaa, sensa ya filamu Zanzibar lapiga marufuku Baa zote ambazo hazina Sound Proof

Na, Fatma Rajab

Baraza la sanaa, sensa ya filamu na utamaduni, (BASSFU) limezuia upigwaji wa mzuki katika maeneo ya baa zote ndani ya Zanzibar ambazo hazina maeneo maalum ya kuzuia sauti (soundproof) ili kuepusha usumbufu unaosababishwa na sauti ya muziki kwa watu mbali mbali ikiwemo wanaofanya ibada, watalii, wagonjwa, wanafunzi na jamii kwa ujumla.

Hayo yameelezwa na katibu mtendaji baraza la sanaa, sensa ya filamu na utamaduni Chuom Juma Chuom wakati alipokuw akizungumza na waabdishi wa habari katika ukumbi wa mkutano wa studio ZBC raha leo zanzibar

Amesema "uamuzi haukuja kwamba tumeamua kuzuia sanaa bali lengo la uamuzi huu ni kutaka jamii ibaki salama dhidi ya maudhi yanayotokana na sauti za upigaji wa mziki katika maeneo ya mabaa ambapo watu wa ibada wwfanya biashara mbali mbali ikiwemo biashara ya utalii, wanafunzi ambao wapo katika mskuli mbali mbali lakini pia na jamii kwa ujumla imekua ikiathirika kutokana na upigaji wa mziki kiholela".

Lengo jengine la uamuzi huo ni kutaka kuweka ustawi mzuri wa jamii amesema" hatuna dhamira mbaya ya kukwaza shughuli za sanaa na burudani tunataka sana, tunapenda sana serikali yetu inayoongozwa na raisi dkt hussein ali mwinyi na waziri wa habari sanaa utamaduni na michezo ni wapenzi wa sanaa na burudani lakini kwa vile kuna wananchi wanaoongoza tunachotaka kwa pamoja ni kutoa fursa kwa sanaa na burudani yenye kufuata maadili mila desturi na ustawi wa kijamii".

Aidha amesema baraza la sanaa limejipnga kwa kushirikiana na vyombo mbali mbali vya serikali ikiwemo jeshi la polisi, afisi za wakuu wa wilaya, masheha ,wakurugenzi wa manispaa pamoja na halmashauri kuhakikisha wanadhibiti baa ambazo zinapiga mziki usiozingatia taratibu na sheria zilizopangwa ikiwemo za kuwepo maeneo maalum ya kudhibiti sauti.

Hata hivyo amesema baraza la sanaa halitatoa leseni katika maeneo ya mabaa ambayo hayana maeneo maalum ya kudhibiti sauti (soundproof)"kwa maeneo ambayo tayari yameshahenga maeneo ya soundproof tutaendelea kutoa leseni katika maeneo hayo lakini pia tutaendelea kuyasimamia kufanya shughuli za sanaa na burudani kwa misingi ya taratibu, sheria kanuni na miongozo mbali mbali ambayo ipo na tunaendelae kuwapatia".

Hiyvo baraza la baraza linaendelea kufanya ziara za ukaguzi katika maeneo yote ya burudani kwa lengo la kudhibiti athari zinazotokana na kelele za muziki kwa jamii," sisi baraza la sanaa kwa kushirikiana na mamlaka ambazo tumezitaja kesho tutafanya operesheni kali ya kudhibiti na kuchkukua hatua kali kwa taasisi ama mtu yoyote ataekwenda kunyume na taarifa hii".

TAMWA ZNZ Kushirikiana na Ofisi ya Makamu wa Kwanza Wa Rais Kupambana na Tabianchi

Na, Fatma Rajab.

Chama cha waandishi wa Habari wanawake Zanzibar TAMWA ZNZ kwa kushirikiana na wadau wa kukabiliana na mabadiliko ya tabianchi ikiwemo Taasisi ya ZACCA ppamoja na Afisi ya Makamo wa kwanza wa Rais Zanzibar, imeandaa mkutano wa kwanza wa mabadiliko ya tabianchi Zanzibar, unaotarajiwa kufanyika Oktoba 20 hadi 22 katika Ukumbi wa Idrissa Abdulwakil Kikwajuni.

Akizungumza na waandishi wa Habari, Mwenyekiti wa kamati ya Jukwaa la mabadiliko ya tabianchi Zanzibar.(ZANCCC) Mahfudh Shaban Haji, amesema lengo la mkutano huo ni kujenga uwezo, uelewa na hamasa kwa asasi za kiraia, wanajamii na idara za Serikali kufahamu dhana nzima ya mabadiliko ya tabianchi na uhimili wake.

Aidha Shaaban ameeleza kuwa katika mkutano huo mikakati mbali mbali ya kitaifa na kimataifa, kama vile mkakati wa mabadiliko ya tabia nchi wa mwaka 2024, sera na mkakati wa uchumi wa buluu, uwajibikaji na matumizi sahihi ya rasilimali za nchi.

Aliongeza kusema kuwa mipango ya nishati safi na mpango wa kitaifa wa maendeleo ya Zanzibar (ZADEP) wa mwaka 2021-2026, na Dira ya Maendeleo ya 2050 inakwenda sambamba na mipango ya kimataifa ya Maendeleo endelevu.

‘Tunafahamu kwa kina kuwa mabadiliko ya Tabianchi ni suala mtambuka mkutano utaainisha lengo hili la maendeleo endelevu la 23 na malengo mengine 16 yaliyokusudiwa kupitia vipindi na mada mbali mbali’’ ameongeza Mahfudh.

Kwa Upande wake Mkurugenzi wa TAMWA ZNZ Dkt Mzuri Issa amewataka waandishi wa Habari kuandika habari zinazoibua changamoto za mabadiliko ya tabianchi ili ziweze kuwafikia walengwa na kufanyiwa kazi.

‘’waandishi wahabari tumieni kalamu zenu kuyaibua na kuyafanyia uchambuzi masuala ya mabadiliko ya tabianchi aliongeza kusema.Dkt Mzuri.

Mwakilishi wa Taasisi ya kukabiliana na manadiliko ya tabianchi ZACCA Ngwali O. Ngwali amesema Ukataji wa mikoko unachochea zaidi mabadiliko ya tabia nchi katika maeneo ya fukwe za Bahari ambapo katika maeneo ya Mkokotoni,fungurefu na Donge yameathirika kwa kiasi kikubwa.

Aidha ameitaka jamii kuyalinda mazingira ili kuhakikisha Zanzibar ya kijani inapatikana.

Jumla ya wadau 35 wanatarajiwa kushiriki mkutano huo wenye kauli mbiu “ imarisha uhimili wa mabadiliko ya tabianchi Zanzibar “

Ujio wa Mufti ISMAIL BIN MUSSA MENKI ZANZIBAR KUTANGAZA VIVUTIO VYA UTALII

Na.Fatma Rajab

Makamu wa Pili wa Rais wa Zanzibar Mhe. Hemed Suleiman Abdulla amesema Ujio wa Mufti ISMAIL BIN MUSSA MENKI kutoka nchini Zimbabwe umetoa fursa kwa Zanzibar kujitangaza zaidi kiutalii kupitia Utalii wa Maadili yani (HALAL TOURISM) uliojikita zaidi katika sheria na misingi ya Uislamu.

Ameyasema hayo katika hafla ya JUKWAA la UWEKEZAJI wa Utalii halali (HALAL TOURISM) lililofanyika katika Viwanja vya Hotel ya Verde Mtoni jijini Zanzibar.

Amesema uwepo wa Mufti Menki nchini umeitangaza Zanzibar kiutalii na kupata fursa ya kujifunza mambo mbali mbali kupitia Jukwaa la Utalii wa maadili lililotoa fursa kwa Mufti huyo na ujumbe wake aliokuja nao katika kuukumbusha umma umuhimu wa mikusanyiko ya dini na kuwa tayari kujitoa kwa ajili ya Allah.

Makamu wa Pili wa Rais amesema Serikali itaendelea kuboresha miundombinu mbali mbali ikiwemo ya barabara, Viwanja vya ndege na Bandari ambavyo vinachochea ukuwaji wa sekta ya Utalii nchini sambamba na kuviboresha vivutio vya utalii ili kuendelea kujitangaza kiutalii hasa katika maeneo ya kihistoria, kutangaza mila, silka na tamaduni njema zinazofuata mwenendo mzima wa kiislam ikiwemo Ibada, mavazi, ukarimu na ushirikiano katika jamii.

Aidha, Mhe.Hemed amefahamisha kuwa Serikali kupitia Kamisheni ya Utalii inaendelea kufanya mapitio ya mwisho ya Sera ya Utalii ya Zanzibar ya Mwaka 2017 kwa lengo la kuifanyia maboresho ikiwemo eneo la Utalii wa maadili kwa kuweka mikakati mbili mbali itakayosaidia kukuza utalii wa kiislam hapa Zanzibar.

Sambamba na hayo Makamu wa Pili wa Rais wa Zanzibar amemuahidi Mufti Menki na ujumbe wake kuwa Serikali na waislamu kwa ujumla watayafanyia kazi yale yote waliyojifunza kutoka kwako na kuwataka kuwa mabalozi wazuri wa kuitangaza Zanzibar kiutalii hasa katika Utalii wa maadili na kuwahamasisha wataalamu mbali mbali wa Kiislamu kuja Zanzibar kufanya Tafiti za historia ya kiislam zitakazosaidia kuitangaza dini na Zanzibar kwa ujumla.

Nae Waziri wa Utalii na Mambo ya Kale Mhe.Mudrik Ramadhan Soraga ameishukuru Kampuni ya Light upon Light kwa kuamua kufanya Jukwaa la Utalii wa maadili Visiwani Zanzibar ambalo litasaidia katika kuitangaza Zanzibar kiutalii na kutanua wigo kwa wageni wengi zaidi kuitembelea Zanzibar.

Mhe. Soraga amesema Jukwaa la Utalii wa maadili ni muhimu katika maendelea ya Zanzibar na kila kilichojadiliwa katika Jukwaa hilo kinalenga katika kuiendeleza Zanzibar kiutalii na kuifanya kuwa Kituo kikubwa cha Utalii Barani Afrika, hivyo atahakikisha kuwa Wizara inachukua juhudi za maksudi kuviboresha vivutio vya utalii na kuanzisha vipya ili kuweza kufikia malengo waliojiwekea.

Kwa upande wake Mufti ISMAIL BIN MUSSA MENKI kutoka nchini Zimbabwe ameishukuru Serikali ya Mapinduzi ya Zanzibar na Wazanzibari kwa ujumla kwa mapokezi ya heshima, upendo na ukarimu walionaompatia yeye na ujumbe wake jambo linalompa faraja ya kuendelea kuitembelea tena Zanzibar na kuahidi kutangaza mazuri yote waliyojifunza Zanzibar .

Amesema kila binaadamu ana wajibu wa kuzitumia neema alizojaaliwa na Allah katika kuisimamia Dini ya kiislam na kuwa tayari kutoa neema hizo kwa ajili ya kuwasaidia wasio na uwezo na wenye mazingira magumu kwa kutambua hilo ndio lengo la kuletwa kwake Duniani kuja kumtumikia Allah (S.W).

Mufti Menki amesema miongoni mwa Ibada anazotakiwa kufanya muislamu ni kufanya kazi ya halali kwa kufuata misingi ya Dini ya kiislamu jambo litakalosaidia waislamu kuishi kwa upendo na kusaidiana pamoja na kukuza kipato cha mtu mmoja mmoja na Taifa kwa ujumla.

Serikali Kutoa Mafunzo kwa walimu wa SMZ

Na, Mwandishi Wetu.

Serikali kupitia Wizara ya Elimu na Mafunzo ya Amali Zanzibar itaendelea kuhakikisha walimu wanapata mafunzo wakiwa kazini yatakayowasaidia kuongeza ujuzi wa hali ya juu ambao utawasaidia katika kutekeleza mfumo mpya wa elimu.

Hayo yamesemwa na Makamu wa Pili wa Rais wa Zanzibar Mhe Hemed Suleiman Abdulla katika ufunguzi wa Kongamano la Maadhimisho ya Siku ya Walimi Duniani yaliyofanyika katika Ukumbi wa Skuli ya Kizimkazi Dimbani Mkoa wa Kusini Unguja.

Amesema ni jambo la muhimu sana kufanyika kwa Maadhimisho ya siku ya walimu duniani yanayolenga kutathmini mafanikio na changamoto za walimu katika kufikia mapendekezo ya hadhi ya walimu yaliyowekwa na UNESCO na ILO yanayosisitiza Taaluma, mazingira bora, hadhi, heshima na maslahi ya walimu.

Mhe.Hemed amesema Serikali katika kulinda hadhi na maslahi ya walimu imeanzisha Tume ya Utumishi ya walimu ambayo madhumuni yake ni kusimamia ustawi na kuendeleza kutunza heshima ya walimu pamoja na kusimamia ujenzi wa makaazi ya walimu na dahalia za wanafunzi katika skuli mbali mbali Unguja na Pemba.

Aidha Makamu wa Pili wa Rais amesema kuwa Serikali imekusudia kujenga chuo cha Uwalimu ambacho kitatumika kutoa mafunzo kwa walimu na kuwajengea uwezo unaoendana na mabadiliko ya Sayansi na Teknoloji duniani ili waweze kufundisha kwa ufanisi zaidi.

Sambamba na hilo Makamu wa Pili wa Rais amewataka walimu kuitumia vyema fursa ya kukusanyika pamoja kwa kubadilishana uzoefu na maarifa na kuliwekea msisitizo suala la uwajibikaji kazini, maadili mema kwa walimu na wanafunzi na kukumbusha sifa za mwalimu bora hasa katika kipindi hiki ambacho Zanzibar inafanya maguzi makubwa ya Mfumo wa elimu.

Makamu wa pili wa Rais wa Zanzibar amesisitiza kuwa serikali kwa kushirikiana na wizara ya elimu na mafunzo ya amali itahakikisha inazitatua changamoto zote zinazowakabili walimu ikiwemo malimbikizo ya fedha za likizo na ufiwa.

Nae Waziri wa Elimu na Mafunzo ya Amali Zanzibar Mhe Lela Mohamed Mussa amesema walimu wana jukumu la kujiongeza kitaaluma na kujiendeleza kielimu kwa walimu wa ngazi zote ili kuendana na mageuzi ya mfumo wa elimu ambao unatumia zaidi Teknolojia na kuwafanya walimu waendane na matakwa ya elimu duniani.

Mhe. Lela amesema kwa kuhakikisha sekta ya elimu inazidi kuimarika Wizara ya elimu imekuwa ikikutana na Uwongizi wa chama cha wafanyakazi na chama cha walimu ili kujadili maslahi na ustawi wa walimu na sekta ya elimu kwa ujumla.

Amesema kuna changamoto nyingi zimejitokeza baada ya ugatuzi ikiwemo posho na nauli za walimu jambo ambalo lipo katika hatua za mwisho za utekelezaji wake na kuwaahidi walimu kuwa Serikali kupitia Wizara ya elimu itahakikisha maslahi na haki za walimu zinapatikana kwa wakati.

Kwa upande wake Katibu Mkuu wa Chama cha Walimu Zanzibar ( ZATU ) Mwalimu HAJI JUMA amesema siki ya walimu duniani inatoa fursa kwa walimu kutafakari mafanikio na changamoto katika sekta ya elimu hasa katika kuinua viwango vya elimu na ustawi bora wa walimu na wanafunzi nchini.

Mwalimu HAJI ameiomba Serikali kuangalia umuhimu wa kuwashirikisha walimu ipasavyo hasa katika ngazi za maamuzi ili kuzidi kuiimarisha sekta ya elimu kwa kutoa elimu bora kwa wanafunzi wote wa Zanzibar.

Amesema ili kuendelea kuboresha sekta ya elimu na mazingira ya utowaji wa elimu bora nchini jitihada za pamoja zinahitajika kati ya Serikali, walimu na wazazi ili kutoa matokeo chanya ya ufaulu kwa wanafunzi wa Zanzibar.